Presidenti rus Vladimir Putin urdhëroi komandantin e ri të luftës së Rusisë kundër Ukrainës, Valeriy Gerasimov, të pushtonte Donbasin i përbërë nga rajonet e Donetskut dhe Luhanskut, njoftoi zëdhënësi i Drejtorisë kryesore të Inteligjencës të Ministrisë së Mbrojtjes së Ukrainës, Andriy Yusov.
Donbasi është prioriteti për forcat ruse, tha Yusov.
Më 11 janar, ministri rus i Mbrojtjes Sergey Shoigu emëroi gjeneralin Valeriy Gerasimov komandant të Grupit të Përbashkët të Forcave të vendit në Ukrainë, raporton Yahoo news.
“Putini nuk i kushton vëmendje realitetit, prandaj ai nuk i ka ndryshuar qëllimet e tij globale: shkatërrimin e ukrainasve si një popull, një komb i veçantë dhe shkatërrimin e Ukrainës si një shtet i pavarur. Mund të flasim për drejtimin prioritar të rusëve që është Donbasi. Dhe afatin tjetër kohor që ai ka përcaktuar tashmë për Gerasimovin, le të themi, liderin e ri të luftës kundër Ukrainës… Ky synim është kapja e Donbasit dhe krijimi i një zone sigurie atje deri në mars”, tha Andriy Yusov.
Vendimi i Ministrisë së Mbrojtjes së Rusisë për të zëvendësuar gjeneralin Sergei Surovikin me Shefin e Shtabit të Përgjithshëm Gerasimov si komandant i luftës së Rusisë kundër Ukrainës tregon “sfida sistemike” për Moskën, tha sekretari i shtypit i Pentagonit Pat Ryder gjatë një konference.